ڕۆژی هه‌ینی ٤ی مانگی خه‌رمانان، كادری ده‌رمانی نه‌خۆشخانه‌ی شه‌هبا له ڕۆژئاوای كوردستان له‌ئاست ئه‌و گه‌مارۆ ده‌رمانییه‌ی ڕژیمی به‌شار ئه‌سه‌د به‌سه‌ریدا سه‌پاندوون ناڕه‌زایه‌تییان ده‌ربڕی.
به‌وته‌ی به‌ڕێوه‌به‌رایه‌تی نه‌خۆشخانه‌ی “شه‌هبا” له ڕۆژئاوای كوردستان، ڕژیمی به‌شار ئه‌سه‌د گه‌مارۆی ده‌رمانی خستووه‌ته سه‌ریان و هیچ ده‌رمانێك له‌و نه‌خۆشخانه‌یه ده‌ست ناكه‌وێت له‌حاڵێكدا ده‌وڵه‌تی داگیركه‌ری توركیا هه‌ر ڕۆژه ناوچه‌ی “شه‌هبا” و “ته‌ل ڕه‌فعه‌ت” توپباران ده‌كات و به‌رده‌وام خه‌ڵك بریندار ده‌بن، به‌ڵام به‌هۆی نه‌بوونی ده‌رمان ناتوانن خزمه‌تگوزاریان پێشكه‌ش بكه‌ن. جێگای ئاماژه‌یه كه كادری ده‌رمانی نه‌خۆشخانه‌ی “ئاڤرین” له شه‌هبا داوای هاوكاری له ناوه‌نده نێوده‌وڵه‌تییه‌كان ده‌كه‌ن و خوازیاری سه‌رنجدانی ناوه‌نده‌كانی مافی مرۆڤ به دۆخی خراپی ئه‌و نه‌خۆشخانه بوون.