سایتی ئه‌تله‌سی زیندانه‌كانی ئێران ڕۆژی پێنجشه‌ممه ٥ی گه‌لاوێژ، ڕاپۆرتێكی له‌سه‌ر ئه‌شكه‌نجه و ئازاری جنسی دژبه‌رێكی حیجابی زۆره‌ملێ به ناوی “ته‌به‌سۆم جه‌مالپور” بڵاو كرده‌وه.
“ته‌به‌سۆم جه‌مالپور” ڕۆژی ٢٦ی پووشپه‌ڕ، پاش بڵاوكردنی وێنه‌یه‌كی بێحجابی خۆی له‌به‌رده‌م ده‌سته‌یه‌كی مه‌زهه‌بی له تاران، له‌لایه‌ن هێزه‌كانی حكوومه‌ته‌وه ده‌ستبه‌سه‌ر و بۆ خانه‌یه‌كی ئه‌من ڕاگوێزرا. ده‌زگای هه‌واڵنێری ته‌سنیم ڕۆژی ٢٨ی پووشپه‌ڕ باسیان له به‌ندكردنی دوو ژن و پیاوێك له به‌رده‌م ده‌سته‌ی مه‌زهه‌بی “قه‌مه‌ری به‌نی هاشم” له ناوچه‌ی ٦ی تاران كردبوو. له ڕاپۆرتی ئه‌تله‌سی زیندانه‌كانی ئێران باس له ڕووت كردنه‌وه‌ی “تبه‌سۆم” و ئازاری جنسی ناوبراو كراوه.